Ardu Angelo

Angelo Maria Ardu (Maria est solu po s’anagrafe) est naschidu in Flussio, bidda de sa Pianalza, oe in provintzia de Oristanis. Fizu de massagiu e pastore e de mama cosidora de isciareu, Istudiat fintzas a su diploma azuende sa famiglia mescamente in sas fainas de campagna (un’andala sigundaria ma longa chi la sighit fintzas a oe). Da-e minore apassionadu de sa poesia improvisada sighinde sas garas da-e palcu in palcu, da-e Remundu Piras in poi. Da-e su 2005 amministradore comunale fintzas a su 2015, e d’est in cussa occasione chi po cherrer fagher calchi cosa de nou in sa ‘idda e po sa limba, sa cultura e sa poesia salda faghet nascher unu cuncursu ‘e poesia po sonettos e ottadas tituladas a “s’Isciareu”, cun sa bonanima de Augusto Piras chi nde fut su presidente fintzas (a cando) chi Deus l’at crefidu. Est tando chi at cumintzadu a contivizare sa poesia de meledu e a connoscher bene sas regulas e sa metrica de sas varias formas poeticas, cun s’iscola de Gigi Piu (poeta de ‘giudu de deris e de oe). In su 2009 at cumintzadu a iscrier calchi cosa de sou e a partecipare a sos cuncursos litterarios peressi-peressi in totu sa Saldigna e caligunu fintzas fora acabidende premios e riconnoschimentos varios. Oe presentat custu “Sinzu ‘e poesias”, in palte ineditas e in palte premiadas in sos varios cuncursos a tema liberu e a tema impostu.